16

വീട്ടിലെ വളർത്തുമൃഗത്തോട് കുട്ടി കാണിച്ച ക്രൂരതയ്ക്ക് അമ്മ നൽകിയ അസാധാരണമായ ശിക്ഷാ രീതി ഇപ്പോൾ സോഷ്യൽ മീഡിയയിൽ കടുത്ത വിവാദങ്ങൾക്ക് വഴിവെച്ചിരിക്കുകയാണ്.

ദേഷ്യം നിയന്ത്രിക്കാനാവാതെ മകൻ വീട്ടിലെ വളർത്തുപൂച്ചയെ തറയിലേക്ക് വലിച്ചെറിയുന്നത് കണ്ട ഉടൻ തന്നെ, ഇതിനേക്കാൾ വലിയൊരു പാഠം അവന് നൽകാൻ ആ അമ്മ തീരുമാനിക്കുകയായിരുന്നു.

തന്‍റെ മകന്‍റെ പ്രിയപ്പെട്ട പ്ലേസ്റ്റേഷൻ 5 ഗെയിമിംഗ് കൺസോൾ അവന്‍റെ കൈയിലേക്ക് നൽകിയ ശേഷം, പൂച്ചയോട് ചെയ്ത അതേ രീതിയിൽ ആ യന്ത്രത്തോടും പെരുമാറാൻ അമ്മ ആവശ്യപ്പെട്ടു.

പെട്ടെന്നുണ്ടായ ഈ നിർദ്ദേശത്തിൽ കുട്ടി അസ്വസ്ഥനാവുകയും വലിയൊരു ആശയക്കുഴപ്പത്തിലേക്ക് വഴുതി വീഴുകയും ചെയ്തു. സ്വന്തം പ്രവൃത്തിയുടെ ഭവിഷ്യത്ത് നേരിട്ട് അനുഭവിക്കാൻ അവനെ പ്രേരിപ്പിക്കുക എന്ന ലക്ഷ്യമായിരുന്നു ഈ അമ്മയ്ക്ക് ഉണ്ടായിരുന്നത്.

ഇതൊരു വലിയ ചർച്ചയായതോടെ സോഷ്യൽ മീഡിയ ഉപയോക്താക്കൾ ഇതിനെ രണ്ട് തട്ടിലായി നോക്കിക്കാണുന്നുണ്ട്. മൃഗങ്ങളെ ഉപദ്രവിക്കുന്നതിലെ ക്രൂരത ചൂണ്ടിക്കാട്ടി ഈ അമ്മയുടെ നിലപാടിനെ പിന്തുണയ്ക്കുന്നവർ ഒരു വശത്തുണ്ട്.

എന്നാൽ, ദേഷ്യത്തിന്‍റെ പേരിൽ കുട്ടിയുടെ കളിപ്പാട്ടം തകർക്കാൻ ആവശ്യപ്പെടുന്നത് ശരിയായ രീതിയല്ലെന്നും, അക്രമം അക്രമത്തെയാണ് പ്രോത്സാഹിപ്പിക്കുകയെന്നും വാദിക്കുന്നവരാണ് ഭൂരിഭാഗവും. മാനസികാരോഗ്യ വിദഗ്ധർ ഇതിനെ ഗൗരവത്തോടെയാണ് നോക്കിക്കാണുന്നത്.

കുട്ടികൾ അക്രമാസക്തരാകുമ്പോൾ ശിക്ഷകൾ നൽകുന്നതിനേക്കാൾ ഉപരിയായി, എന്തുകൊണ്ടാണ് അവർ ഇത്തരം പ്രവൃത്തികൾ ചെയ്യുന്നതെന്ന് മനസിലാക്കി, ശാന്തമായി കാര്യങ്ങൾ പറഞ്ഞ് കൊടുത്തു തിരുത്തേണ്ടത് അനിവാര്യമാണെന്ന് വിദഗ്ധർ ചൂണ്ടിക്കാട്ടുന്നു.

ദേഷ്യം കൊണ്ട് മറ്റൊരു അക്രമത്തിന് മുതിരുന്നത് ആ കുട്ടിയുടെ പെരുമാറ്റത്തിൽ കാര്യമായ മാറ്റം വരുത്തില്ലെന്നും മറിച്ച് കൂടുതൽ ദേഷ്യം ജനിപ്പിക്കുകയേ ഉള്ളൂവെന്നും ഇവർ ഓർമ്മിപ്പിക്കുന്നു.